სამგზავრო აბონემენტის შეძენა ნებაყოფლობითია, შეგიძლიათ გააგრძელოთ ძველი ბარათებით მგზავრობა - გავრცელდება თუ არა შეღავათები საბანკო ბარათებით მგზავრობაზე? - პალიტრა ვიდეო

დღეიდან, 5 იანვრიდან, სამგზავრო აბონემენტების გაყიდვა დაიწყო. მსურველებს მათი შეძენა მეტროს სალაროებში და ასევე, "საქართველოს ბანკის" ექსპრეს ფილიალებში შეუძლიათ.

1-ლი თებერვლიდან ძალაში შევა საზოგადოებრივი ტრანსპორტით მგზავრობისას სააბონემენტო ულიმიტო სისტემა, ერთჯერადად მგზავრობის შემთხვევაში კი ტარიფი 1 ლარი იქნება.

თბილისის მერიის ინფორმაციით, აბონემენტის შეძენა ნებაყოფლობითია, ვისაც სურს აიღებს, ვისაც არა - გააგრძელებს "მეტრომანის" ან საბანკო ბარათის გამოყენებას, მათი გამოყენების შემთხვევაში კი 90 წუთის განმავლობაში მგზავრობა კვლავ უფასო იქნება. შეიცვლება მხოლოდ მგზავრობის საფასური და ის 50 თეთრის ნაცვლად, 1 ლარი იქნება.

"გარდა სააბონემენტო სერვისისა, ძალაში დარჩება გადახდის სტანდარტული სისტემაც. სააბონემენტო გადახდის სერვისი არის მოსახერხებელი და მგზავრის ინტერესებზე გათვლილი. მისი შეძენა ნებაყოფლობითია", - განუცხადეს თბილისის ტრანსპორტისა და ურბანული განვითარების სააგენტოში mshoblebi.ge-ს.

შეგახსენებთ, რომ 1-ლი თებერვლიდან სააბონემენტო ბარათებს განსხვავებული ფასი ექნებათ:

• 90-წუთიანი ბარათი - ერთი ლარი
• ერთდღიანი ბარათი - სამი ლარი
• ერთკვირიანი ბარათი - 20 ლარი
• ერთთვიანი ბარათი - 40 ლარი
• სამთვიანი ბარათი - 100 ლარი
• ექვსთვიანი ბარათი - 150 ლარი
• ერთწლიანი ბარათი - 250 ლარი