ჯანდაცვის სამინისტრო კოვიდინფექციის მართვის ახალ ეტაპზე გადადის. როგორც ჯანდაცვის მინისტრი ეკატერინე ტიკარაძე აცხადებს, ეს ინფექციის მართვის აქტიური ფაზაა და ვირუსთან ბრძოლაში პრაქტიკოსი მედპერსონალის ჩართვა და გააქტიურება იგეგმება. მისი თქმით, საწოლფონდი საკმარისია და ამ მხრივ პრობლემები არც რეგიონებში შეიქმნება.

სულ მალე კორონავირუსის პანდემიის დაწყებიდან 1 წელი გავა. ამ პერიოდში კაცობრიობამ უდიდესი დანაკარგი განიცადა. ვირუსს შეეწირა მილიონობით ადამიანი, ზოგიერთ გადარჩენილზე კი სამუდამო კვალიც დარჩა. მიუხედავად იმისა, რომ ვირუსი 1 წელია მთელ მსოფლიოში გავრცელებულია და მასზე პრაქტიკულად ყველა სამედიცინო კვლევითი გუნდი მუშაობს, ხოლო წამყვანი სახელმწიფოები ერთმანეთის უპირატესობის დასამტკიცებლად ცდილობენ, პირველებმა შექმნან ვაქცინა, ამ მხრივ ჯერჯერობით არსებითი წინსვლა არ არსებობს.

სიუჟეტი მოამზადა ნინი გაბისონიამ.