რა ხდება ირანში - პალიტრა ვიდეო

ირანში ხელისუფლების წინააღმდეგ ფართომასშტაბიანი დემონსტრაციები გრძელდება, რომელშიც, ქვეყნის მასშტაბით, ათასობით ადამიანი მონაწილეობს. 2009 წლის შემდეგ ეს ყველაზე დიდი საპროტესტო აქციაა, თუმცა ბევრად განსხვავებული, ვიდრე 8 წლის წინ. 2009 წელს დემონსტრაცია იმართებოდა თეირანში და რამდენიმე მსხვილ ქალაქში, მონაწილეები კი მეტ პოლიტიკურ თავისუფლებას ითხოვდნენ. ამჯერად საპროტესტო აქციები უფრო პატარა, ღარიბ ქალაქებშიც მიმდინარეობს.

დემონსტრაციები პრეზიდენტ ჰასან რუჰანის და მისი ეკონომიკური პოლიტიკის წინააღმდეგ დაიწყო. ხალხი ინფლაციას, უმუშევრობის მაღალ მაჩვენებელს და კორუფციას აპროტესტებდა, თუმცა მოთხოვნები მალე ბევრად დიდი და მნიშვნელოვანი გახდა - დემონსტრაციის მონაწილეები ირანის ყველაზე გავლენიანი ადამიანის, უზენაესი ხელისუფლის - ალი ხამენეის გადადგომას ითხოვენ. მათ ასევე სურთ, ირანი აღარ მონაწილეობდეს სირიასა და ლიბანში მიმდინარე პროცესებში.