"ყაზბეგის მუნიციპალიტეტის სოფელ ჯუთას გზა ჩაინგრა" - კადრები ადგილიდან
"ყაზბეგის მუნიციპალიტეტის სოფელ ჯუთას გზა ჩაინგრა" - კადრებს ადგილიდან მოქალაქე ნინო მოლაშვილი აქვეყნებს.
არსებული ინფორმაციით, არავინ დაშავებულა.
საავტომობილო გზების დეპარტამენტმა აღნიშნულთან დაკავშირებით განცხადება გაავრცელა.
"საქართველოს ინფრასტრუქტურის სამინისტროს, საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის აჩხოტი-სნო-ახალციხე-ჯუთას საავტომობილო გზაზე მიმდინარე წლის აპრილიდან გააქტიურებულია არსებული (ისტორიული) მეწყერი და დაზიანებული მონაკვეთის აღსადგენად შესაბამისი სამუშაოები უკვე დაწყებულია.
აღნიშნულ გზაზე გადაადგილება აკრძალულია 2022 წლის ივნისიდან. ამ ეტაპზე, მეწყერი ისევ აქტიურ დინამიკაშია მოსული.
პირველ ეტაპზე, პრიორიტეტად განისაზღვრა დროებითი გზის მოწყობა, რაც უზრუნველყოფს გადაადგილების მინიმალურ უსაფრთხოებას. პარალელურად, გრძელდება გეოლოგიური კვლევები და მუდმივი მონიტორინგი, რის საფუძველზეც დაიგეგმება გზის საბოლოო გამაგრება და სრულყოფილი რეაბილიტაცია.ადგილზე იმყოფებიან, დეპარტამენტისა და კონტრაქტორი ორგანიზაციის წარმომადგენლები, რომლებიც ადგილზე სწავლობენ არსებულ მდგომარეობას, რათა უმოკლეს ვადებში მოხდეს დაზიანებული გზის აღდგენა და შემდგომი ნაბიჯების დაგეგმვა", - ნათქვამია განცხადებაში.