რუსებმა ზაპოროჟიეს დაარტყეს, რის შედეგადაც, ერთი ადამიანი დაიღუპა და 22 დაშავდა
რუსებმა ზაპოროჟიეს დაარტყეს, რის შედეგადაც, ერთი ადამიანი დაიღუპა და 22 დაშავდა, - ამის შესახებ ინფორმაციას უკრაინული მედია ზაპოროჟიეს საოლქო-სამხედრო ადმინისტრაციის ხელმძღვანელზე, ივან ფედოროვზე დაყრდნობით ავრცელებს.
„რუსებმა ოლქის ცენტრს სხვადასხვა ტიპის იარაღით დაარტყეს. მასიური იერიშის დროს რუსებმა ზაპოროჟიეზე სულ მცირე 12 დარტყმა განახორციელეს“, - აცხადებს ივან ფედოროვი.
ფედოროვის ცნობით, დაშავებულებს შორის სამი ბავშვია.
ზაპოროჟიეს საოლქო-სამხედრო ადმინისტრაციის ხელმძღვანელის განცხადებით, რუსული ძალების თავდასხმის შედეგად, 14 საცხოვრებელი კორპუსი და 40-ზე მეტი კერძო სახლი დაზიანდა, ასევე მოსახლეობის ნაწილი ელექტროენერგიის გარეშე დარჩა.
ასევე, უკრაინის საჰაერო ძალების ინფორმაციით, რუსებმა დრონებისა და რაკეტების გამოყენებით დნიპროზე მასიური შეტევა განახორციელეს.