CNN-ის ინფორმაციით, აშშ-ის პრეზიდენტის, დონალდ ტრამპის ადმინისტრაცია ნატოს დაფინანსების მნიშვნელოვნად შემცირებას აპირებს. ამ გზით დაზოგილი ფულის ნაწილით აშშ აპირებს, საქართველოსა და უკრაინას დაეხმაროს - წერს CNN.

ამჟამად აშშ-ის კონტრიბუცია ნატოს ბიუჯეტში 22%-ია, თუმცა ტრამპის ადმინისტრაცია აპირებს, ეს მაჩვენებელი შეამციროს 16%-მდე. საუბარია არა წევრი ქვეყნების ეროვნული თავდაცვის ბიუჯეტზე, რაც წევრი ქვეყნების მშპ-ის 2% უნდა იყოს, არამედ ნატოს საორგანიზაციო ხარჯების პირდაპირ ბიუჯეტზე, რაც CNN-ის თანახმად, შედარებით ნაკლებია — 2.5 მლრდ აშშ დოლარი.

CNN-ს თავდაცვის დეპარტამენტის მაღალჩინოსანმა განუცხადა, რომ ის თანხა, რასაც აშშ დაზოგავს, გამოყენებულ იქნება არა მხოლოდ აშშ-ის სამხედრო და უსაფრთხოების პროგრამებზე ევროპაში, არამედ პროგრამებზე ნატოს არაწევრ ქვეყნებში, საქართველოსა და უკრაინაში, რომლებსაც აშშ-ში განიხილავენ, როგორც რუსეთთან „ფრონტის ხაზზე მდგარ სახელმწიფოებს“.