“ეს სია უნდა გახდეს მთელი ქვეყნისთვის ცნობილი“ - მიხეილ სააკაშვილი ე.წ. შავი სიის შექმნის ინიციატივით გამოდის - პალიტრა ვიდეო

როგორც „ნაციონალური მოძრაობის“ წევრმა რომან გოცირიძემ რუსთავის პენიტენციურ დაწესებულებაში სააკაშვილის მონახულების შემდეგ განაცხადა, აღნიშნული სია უნდა გახდეს მთელი ქვეყნისთვის და საერთაშორისო საზოგადოებისათვის ცნობილი, რათა მათ საზღვარგარეთ თავისუფალი გადაადგილება აეკრძალოთ და სხვა სახის აპრობირებული პერსონალური სანქციები დაუწესდეთ.

“ერთ-ერთი მთავარი საკითხი იყო პარლამენტში დროებითი საგამოძიებო კომისიის შექმნა და ამავე დროს, მიხეილ სააკაშვილმა გაიხსენა ის იდეა, რომელიც ეხებოდა ე.წ. შავი სიის შექმნას ძალოვანი და სხვა სახელმწიფო სტრუქტურების წარმომადგენლების - მოსამართლეების, პროკურორების, პოლიციელების და სხვათა მიმართ, რომლებიც ეწეოდნენ ადამიანების პოლიტიკურ დევნას, რეპრესიას. ეს სია უნდა გახდეს მთელი ქვეყნისთვის და საერთაშორისო საზოგადოებისათვის ცნობილი, რათა შევუზღუდოთ მათ საზღვარგარეთ თავისუფალი გადაადგილება. ასევე, სხვა სახის აპრობირებული პერსონალური სანქციები იყოს დაწესებული მათ მიმართ. ის ადამიანები, რომლებიც ხალხსა და პოლიტიკოსებზე ძალადობენ სასამართლოს სახელით, თბილად არიან მოკალათებულნი, აგროვებენ სიმდიდრეს და თავს გრძნობენ დაუსჯელად. უნდა ჩამოყალიბდეს იურისტთა ჯგუფი, რომელიც ყველა ამ საკითხს შეისწავლის. ბევრი რამ პირდაპირ ზედაპირზე დევს და შემდეგ ეს სია უნდა გადავცეთ ჩვენს საერთაშორისო პარტნიორებს“, - აღნიშნა რომან გოცირიძემ.