მოსკოვში პუტინის მთავარი ოპოზიციონერი ბორის ნემცოვი მოკლეს - პალიტრა ვიდეო

მოსკოვის ცენტრში რუსეთის ოპოზიციის ერთ-ერთი ლიდერი და ყოფილი ვიცე-პრემიერი, ბორის ნემცოვი მოკლეს. ტრაგედიის დეტალები დგინდება. პირველადი მონაცემებით, ბორის ნემცოვი ადგილობრივი დროით ღამის 23:30 საათზე მოკლეს. ვრცელდება ინფორმაცია, რომ მას თეთრი ავტომობილი მიუახლოვდა, საიდანაც მსხვერპლს 4-ჯერ ესროლეს ზურგში. 55 წლის პოლიტიკოსი, მოძრაობა "სოლიდარნოსტის" დამფუძნებელი მიღებული ჭრილობების შედეგად ადგილზევე გარდაიცვალა.

ნემცოვი ბორის ელცინის პრეზიდენტობის დროს ვიცე-პრემიერის პოსტს იკავებდა და მის ერთ-ერთ მემკვიდრედ მოიაზრებდნენ. მას ეკონომიკის რეფორმატორად იცნობდნენ იმ პერიოდში, როცა რუსეთის ერთ-ერთი უდიდესი ქალაქის, ნიჟნი ნოვგოროდის მმართველი იყო. შემდეგ ოპოზიციონერი გახდა და რუსეთის პრეზიდენტის, ვლადიმირ პუტინის მწვავე კრიტიკოსად იქცა. ნემცოვი იყო ერთ-ერთი ორგანიზატორი საპროტესტო აქციისა, რომელიც მოსკოვში 1 მარტისთვის არის დაგეგმილი.