რა გადაწყვეტილება მიიღო სასამართლომ ნაციონალისტი ახალგაზრდების წინააღმდეგ, რომლებიც მარჯანიშვილზე არეულობის დროს დააკავეს
"ნაციონალისტური მოძრაობა - ქართული ძალის" ნაწილს სასამართლომ აღმკვეთი ღონისძიების სახით 10 ათასლარიანი გირაო შეუფარდა, ნაწილი კი სასამართლო დარბაზიდან მშობლების ზედამხედველობის პირობით გაათავისუფლა. გირაო შეეფარდა ამ საქმეში ბრალდებულ 5 სრულწლოვან პირს, ხოლო დანარჩენი 7 არასრულწლოვანი მშობლების ზედამხედველობის პირობით გაათავისუფლა. სასამართლო სხდომა დახურული იყო, ვინაიდან საქმეში მონაწილე ბრალდებულების ნაწილი არასრულწლოვანია. პროკურატურა სასამართლოს გადაწყვეტილების გასაჩივრებას აპირებს. "ნაციონალისტური ორგანიზაცია - ქართული ძალის" 11 წევრი პოლიციამ რამდენიმე დღის წინ მეტროს სადგურ "მარჯანიშვილთან" დააკავა. ისინი აღმაშენებლის გამზირზე თურქულ რესტორნებზე მინებს ამსხვრევდნენ და ქსენოფობიურ განცხადებებს აკეთებდნენ.