სათამაშო ბიზნესის ბრუნვამ 2017 წელს 5,6 მილიარდს გადააჭარბა - პალიტრა ვიდეო

2017 წელს სათამაშო ბიზნესის ბრუნვამ 5 მილიარდ 650 მილიონი ლარი შეადგინა, რაც 1 მილიარდ 600 მილიონი ლარით მეტია გასული წლის ანალოგიურ მონაცემზე. სათამაშო ბიზნესიდან ბიუჯეტში გადახდილმა თანხამ კი გასულ წელს მხოლოდ 332 მილიონი ლარი შეადგინა, რაც მთელი ბრუნვის მხოლოდ 5,8%-ია. 2006 წლიდან დღემდე, სათამაშო ბიზნესის ბრუნვა 187-ჯერ არის გაზრდილი.

2017 წლის მდგომარეობით, 136 სუბიექტზე გაცემული იყო და მოქმედებდა 256 სათამაშო ბიზნესის ნებართვა, მათ შორის, ტოტალიზატორის მოწყობის - 91, სამორინეს მოწყობის - 21 ნებართვა, სისტემურ-ელექტრონული ფორმით თამაშობები 16 ნებართვის ფარგლებში ეწყობოდა.

პარლამენტში შესულია კანონპროექტი "ლატარიების, აზარტული და მომგებიანი თამაშობების მოწყობის შესახებ" კანონში ცვლილებების შესახებ, რომელიც ონლაინ-აზარტული თამაშებისთვის გარკვეული შეზღუდვების დაწესებას გულისხმობს, თუმცა მისი მიღება ამ დრომდე არ მომხდარა.