დღეს ეს კაცი უკრაინაში ყველაზე პოპულარულია და სააკაშვილს ეპატიჟება - ცოტა ხნის წინ კი "მიხოზე" ასეთ პაროდიებს აკეთებდა - პალიტრა ვიდეო

უკრაინის პრეზიდენტობის კანდიდატმა ვლადიმირ ზელენსკიმ ქართველი ჟურნალისტების საპასუხოდ, კომენტარი გააკეთა ოდესის ყოფილი გუბერნატორის მიხეილ სააკაშვილის შესახებ და განაცხადა, რომ ის სერიოზული დიპლომატია და მისი დახმარება ყველას გამოადგება.

"ჩამოვიდეს უკრაინაში. ვფიქრობ, მიხეილ სააკაშვილი ახლა თამაშობს ყველაზე დიდ როლს, როდესაც იცავს უკრაინის დემოკრატიას ევროპაში და ამას აჩვენებს თავისი ქმედებებით. ის სერიოზული დიპლომატია და სერიოზული კონსულტანტი ყველა ადამიანისთვის, ყველა კანდიდატისთვის, ვინც დღეს პოლიტიკაში მოდის. ვფიქრობ, ისეთი ადამიანის დახმარება, როგორიც სააკაშვილია, ყველას დასჭირდება", - განაცხადა პრეზიდენტობის კანდიდატმა.

ზელენსკის ამ განცხადებას საქართველოს ექსპრეზიდენტი მიხეილ სააკაშვილი "ფეისბუქის" პირად გვერდზე უკვე გამოეხმაურა და დაწერა, რომ ზელენსკი არ ჰგავს ტრადიციულ პოლიტიკოსებს.

"ქართველი ოლიგარქის არხი, როდესაც ზელენსკის ეკითხებოდა, იმედოვნებდა, რომ უპასუხებდა: რას ამბობთ, რა სააკაშვილი, გაეთრიოს თავის საქართველოში - უმეტესობა უკრაინელი "პოლიტიკოსებისა" სწორედ ასე უპასუხებდა", - წერს სააკაშვილი "ფეისბუქის" პირად გვერდზე.

დღევანდელმა განცხადებებმა მაყურებელს ზელენსკის პაროდიები გაახსენა, სადაც მისი "სამიზნე" სააკაშვილი იყო.