94 წლის მოხუცმა ქალმა საარჩევნო ბიულეტენი საჯაროდ დახია და შეჭამა - პალიტრა ვიდეო

უკრაინის ქალაქ ლვოვში 94 წლის მოხუცმა ქალმა საარჩევნო უბანზე სკანდალი მოაწყო. მან კატეგორიული უარი განაცხადა გადასატან ყუთში ჩაეგდო ბიულეტენი და საარჩევნო უბნის წევრებთან 4 საათის განმავლობაში ჩხუბობდა. მოხუცის აღშფოთება გამოიწვია იმ ფაქტმა, რომ იგი შეყვანილი იყო იმ პირთა სიაში, რომელთაც დამოუკიდებლად გადაადგილება არ შეუძლიათ და გადასატანი ყუთით უნდა მისცენ ხმა. მიუხედავად საარჩევნო უბნის წევრთა არაერთი განმარტებისა, რომ იგი კანონს უნდა დამორჩილებოდა და ხმა სახლში მიეცა, მოხუცი აგრესიული ტონით აგრძელებდა საკუთარი მოსაზრების მტკიცებას, ბოლოს კი დემონსტრაციულად დახია ბიულეტენი და შეჭამა.

უკრაინაში რიგგარეშე საპარლამენტო არჩევნები მიმდინარეობს. საარჩევნო უბნები ადგილობრივი დროით 08:00 საათზე გაიხსნა და 20:00 საათზე დაიხურება. არჩევნები შერეული სისტემით მიმდინარეობს: 225 დეპუტატს პროპორციული სიით ირჩევენ, 199-ს კი მაჟორიტარულით.

არჩევნებში 22 პარტია მონაწილეობს. პროცესს 1719 დამკვირვებელი აკვირდება.