თმის საშრობი, რომელიც ცხელი ჰაერის ნაცვლად ცეცხლის ალს უშვებს, "ამაზონზე" იყიდებოდა - პალიტრა ვიდეო

"ამაზონმა" გაყიდვიდან ამოიღო თმის საშრობი, რომელიც ცხელი ჰაერის ნაცვლად ცეცხლის ალს უშვებდა. ინფორმაციას The Independent-ი ავრცელებს.

აშშ-ში, სამხრეთ კაროლინაში მცხოვრებმა ერიკა ოგტან სქულბრედმა "ფეისბუქზე" გაავრცელა ვიდეო, სადაც ჩანს, როგორ უჩნდება ცეცხლი ჩართვის დროს კომპანია OraCorp-ის საშრობს. ერიკა აღნიშნავს, რომ მას ხელზე მცირე დამწვრობაც აქვს.

თმის საშრობი სქულბრედმა 19.99 დოლარად შეიძინა. "ამაზონზე" ნივთი ამჟამად აღარ იყიდება, თუმცა ერიკა ამბობს, რომ მწარმოებელი კომპანია ინციდენტს, ჯერჯერობით, არ გამოხმაურებია.